Ai 14 de nuvëmber dala 20:30 vala inant cun l Forum Sëlva, l mumënt de ancunteda y descuscion publica sun temesc de atualità y vita soziela te Gherdëina. Chëst’iëde vala dl sport y plu avisa dl raport cumplicà di jëuni, amez ite danter sport agonistich y na vita normala da sculè o laurant.Mëisa turonda daviërta al publich cun la partezipazion
de espunënc dl mond dl sport de Gherdëina
Lidia Bernardi (pres. Schi Club Gherdëina y resp. sezion sportiva ITE Raetia)
Romed Moroder (trainadëur de schi nordich y saut)
Albert Perathoner (presidënt Hockey Club Gherdëina)
Verena Stuffer (atleta dla naziunela taliana de schi alpin)

La dut. Ivonne Daurù Malsiner, esperta de dietologia y psicologia dl’alimentazion,
rujenerà dl raport danter alimentazion, sport y agonism.

L sport ie ncueicundì na cumpunënta mpurtanta de nosta sozietà. Gherdëina à na gran tradizion tl sport, mascimamënter tl sport da d’inviërn sciche schi alpin, nordich y hockey, ma for deplù nce tla disciplines da d’instà. Y ciun ie pa l raport di jëuni cun l sport? Danter la funzions ricreativa, educativa y agonistica, ciuna ie pa la drëta? L mudel dla sozietà produtiva y dl suzes à arjont nce l mond di jëuni y dl sport, ulache l vën pretendù for deplù. Povester de massa? A chësta y autra dumandes cialeran de dé respostes tl Forum Sëlva.

Tres la sëira mëina Leo Senoner.