GIAURIDA
Ntroduzione artistica: Danila Serafini
Intermezzo: Acajo
Buffet: Hotel Mignon

La mostra prejënta i prims doi ani dl viac da turnadëur de Andreas Senoner. L ie da udëi pec turnei de uni grandëza cun formes scëmples y nëtes. 
L lëur per realisé n pez scumëncia per Senoner bele giut dan mëter l toch de lën sun la turnadëcia. Ël va gën nstës ncantëur, dai paures o tl bosch, a se crì ora l lën per si lëures. Gran pert dl leniam che ël adrova per turné abinel perchël ti raions ntëurvia, datrai se tolel pea vel’ pez nce da si viages plu dalonc. L’ispirazion per la formes y i culëures de si pec, ti vën a Andreas Senoner n gran pert dala natura nstëssa. Vel’ pez metù ora ie unì brujà y d’autri ie unic tratei te manieres desferëntes, ma mpo: i à n cialé ora defin naturel. N se ntënd, che l artist ie bon de ti dé valor al toch de lën, a si carateristiches natureles. La forma, l culëur y la vëta: dut ie mo da udëi ti lëures finei de Senoner, lëures che conta nscila nce na storia: la storia dl lën da chëi che i ie nasciui.

Andreas Senoner ie nasciù tl 1962 te Sëlva. Cun 14 ani iel jit a mparé l mestier da marangon da n moster. Te berstot ie nasciuda la gran pascion per l lën, na pascion che ie chersciuda for plu y plu. I lëns, si formes y culëures à per ël na gran faszinazion, unfat sce l ie da mont su o de viac, a pé o cun la roda. Si grandëza, coche i crësc, si rames ntortes, si forza y la vita che ie ti lëns laite descëida for inò la marueia tl artist. Da chësta pascion ie nasciuda l’idea de ulëi mparé a turné. Nsci se à Andreas Senoner, canche l ie jit n pension, cumprà na turnadëcia, se ntendan riesc, che l à abinà l sie. “L me sa bel a udëi coche l toch de lën che é crì ora se muda man man che l torne. Mi esperienza da marangon me juda dassënn a cunëscer la carateristica dl lën y a capì cie che posse fé dainora” nsci l artist.

ORARS DE GIAURIDA
Daviert uni di dala 16:00 ala 19:00.
Merdi, mierculdi y vënderdi nce dala 20:00 ala 22:00
Lunesc stlut.