I lëures depënc de Andreas Zingerle se muev te n ciamp de tenjion danter realism y reduzion. La pitures che vën a s’l dé ti semea al pruzes de svilup dla fotografia analogica. I chedri vën laurei ora y depënc de plu iedesc, nchin a n cër pont de svilup, canche Ia laurazion vën agaieda. La sëuraspersa dl cheder se concia ite, tres chësc pruzes, danter imajes tleres y chëles tëurbles, danter finzion y realtà, la persones fates ju se muev danter recunescibeltà y anonimat.
L’autentizità dla operes figuratives se mostra sëuradut tres n mutif che sauta for inò ora y dà tl uedl. L ne vën nia pià via dal corp dla persona ma l vën adurvà si retrat sot a forma de popa de gumi, de chëles da abiné sun l marcià erotich. I corps de plastica suflei su vën ngrumei, ntorc y raidei singularmënter o te grupes y, metui te na forma, vëni culei tl peton nsci da giapé nultima n mëudl permanënt. La figura umana astrata a livel ndustriel vën culeda te na maniera plu o manco reéla y metuda te n ciamp de tenjion danter rapresentazion realistica y perzezion astrata.