Ntroduzion: Marco Forni

Uni di 16:00 - 19:00
Merdi, mierculdi y vënderdi nce dala 20:00 - 22:00
Lunesc stlut

L dialogh ie la fundamënta per na cunvivënza. L juda a ntënder y a respeté pruspetives desvalives, l gëura orizonc nueves y mostra su ponc d’ududa alternatives. Nsci iel nce ntan l dialogh danter persona y natura. Dé y to fossa pensà te na maniera valiva, tl respet y cun cuscienza. Canche Armin Grunt tol tla man la sia a motor, pona ti dà la natura dant la direzion. I muvimënc dl scultëur ti va do cun slune y ntuizion ala vëta dl lën, ti dajan a chësta maniera n’esprescion a cie che l material naturel à da cunté. L dialogh va for inant. Y ntant se mudons tresora, da gën o zënza se ntënder, avisa coche l se muda nce nosc ntëurvia. Dut se muev. Te ciuna direzion, ne savons mo nia.

Armin Grunt (1969*) à fat la scola d’ert te Gherdëina y lëura dal 1992 incà coche artist ndependënt. Ël ie cumëmber de UNIKA y à metù ora si lëures te deplù mostres, tla Talia y nce oradecà. Armin Grunt à nce fat pea deplù cuncorsc de scultures tla nëif y dlacia, danter l auter tl Canada, USA y Ruscia.