La lia culturela Tublà da Nives se ncunforta de pudëi prejenté na panoramica dl opra de Hugo Vallazza (1955 - 1997). Hugo Vallazza lëura danter i ani ‘70 y ‘90 a n stude nia formel, astrat che tol ispirazion dai elemënc naturei che caraterisea Gherdëina y Urtijëi, si luech de nasciuda. “Dessënie per me lecurdé dla natura, - scrijel te si diar - dessëni mé la spiritualità y l esperienza dla natura”. Cun cunvinzion de sté dalonc dal palch dl mont dl’ert, lëura Vallazza tl plën dla cresciuda economica y dla sozietà dl consum, n contest storich y culturel che l porta a se n mucé dala vijion dl’ert coche marcanzia y afermè da nuef l valor dl’ert nstëssa coche forma de ejistënza y rejistënza nteletuela. Si pitura nia formela y monocromatica se posizionea coche negazion ala regules dl juech y pertënd l dërt de vester achiet, nia laureda ora o fineda.
A 27 ani da si mort buneriva, nes conta l lëur de Hugo Vallazza for mo de na prospetiva dejengianeda, che ne se lascia nia ite a la mpermetuda idilica de ruvé inò adum cun la natura, ma nes cunsiëia ponc nueves de ududa che proa a ntënder miec chiche son y coche vivon nosta lerch.
17.02 - 15.03.2024Uni di dala 15:00 ala 18:00. Lunesc stlut.
Curadëura dla mostra ie Greta Langgartner
RAI LADINIA - Trasmiscion di 28.02.2024
https://www.rainews.it/tgr/trail/video/2024/02/hugo-vallazza-087e279f-d114-4d7f-8608-1ce017f830bc.html
