Inaugurazion 25.01.2025 dala 20:00

Daviert uni di ora dl lunesc dala 15:00 ala 18:00

L proiet “TRÄUME // VANISHING” va ite sot tl cuer de na generazion che se mët a cunfront cun n contest vivù te na maniera for plu desvaliva y nia definida che se muda tresora. L obietif ie chël de descurì l cuntat dla trasfurmazion dl cuntemporan, cul mëter al luster la ndesfidedes persuneles y culetives che spëisa la dejilujion per l daunì. Te n tëmp ulache la segurëzes semea se desfanté, muessa la persona se lascé mé sun si esperienza persunela y, cun gran tribulazion, purvé a ti dé n senificat a na sozietà fluida y zënza ravises de identità.
Tres na esposizion vijiva, metuda ora coche instalazion y sperimentazion, sotrissea l proiet la sfëntes y la irgulariteies che caraterisea nosc tëmp analisan la relazions che ie danter persona y pluralità, sulentum y culetività, binomes che porta ala definizion totala de na generazion dejengianeda che se muev danter flistres de realtà, ti jan permez a si tëmes y melsegurëzes. Chisc lëures proa a mëter dant na paruda coerënta de n mond che muda do a do.
Chësc proiet ne ie nia mé na reprejentazion estetica, ma l uel descedé tl spetadëur la ueia de pensé do, a na maniera ativa, sun chël che ie si pert te n contest senester. L ie n nvit a definì da nuef l raport cun la realtà che ie ntëurvia, cul recunëscer la fluidità sciche na carateristica che fej pert de nosc tëmp y cul abiné ora modaliteies nueves per se fé na identità. “TRÄUME // VANISHING” uel vester na pert sterscia y sota de na generazion carateriseda da pesimënzes y melsegurëzes, che uel giaté dimenscions nueves ulà pudëi sté y abiné ora si identità.