PULTREDES, ANEDOC, ESPERIENZES PERSUNELES, MINONGHES SOZIELES Y VEL’ STORIA DA RÌ.

D’ansciuda dl ann 2024 à Ivan Senoner tëut la dezijion de se tò n ann sabatich per realisé un di sëmies che l ova bele canche l fova pitl: fé na raida ntëur al mond. Nscila se à svilupà man man l’idea cuncreta de sté demez per adés cater mënsc, jan a vijité nazions de chëles che l ova liet y audì truep, ma che per rejons plu desfrëntes ne n’ovel mei pudù vijité. ”Mi raida ntëur al mond” ie stata na esperienza de viac y de vita che l à purtà te cater cuntinënc y te nuef nazions, jan de viac dassëul ma nce ancuntan sun streda trëi cumpanies de viac. Sëuraprò à Ivan Senoner mo pudù jì a crì cater persones de Gherdëina sparpaniedes ora per l mond, che l à fat sentì da cësa nce canche l fova milesc y milesc de chilometri dalonc da si ncësa. I posć vijitei fova n sustanza i USA West Coast y East Coast, la Polinesia Franzëusa, la Nueva Zelanda, l’Australia, l Iapan, l Laos, la Cina, l Vietnam y ala fin mo la Thailandia. L se à nuzà de joler, ferata, curiera, roda, auto, bastimënt y l à nce fat na trata per trëi dis sun na berca a vëila; i chilometri a pé ne à sambën ënghedeno mancià. L ie propi vëira coche scrijova l filosof Arthur Schopenhauer: “L suzed mé ntan i viages: n mëns nes sà plu lonch che cater mënsc passei a cësa.”