Giaurida 21.07.2020 - 20:00

Salut: Esther Videsott, art-director
Ntroduzione artistica: Camilla Nacci
Intermezzo: Marion Moroder

22.07. - 05.08.2020

Uni di: 16:00 - 19:00 / Dumënia, merdi, mierculdi y vënderdi: 20:30 - 22:00
Lunesc stlut

Tla mostra studieda ora per l Tublà da Nives se giamieia ju sezions defrëntes che curespuend a mumënc defrënc dl’opra de Laurina: da n bënunì figuratif, ulache opres sun tëila o sun papier conta dl nmaginer dl’artista, tomen ite tl audiovisif che mostra intermitënzes de video-animazions, per pona ruvé pra i “saudeies de mauta cueta” fac de scultures permò nasciudes che porta i personajes de Laurina Paperina tla terza dimenscion. Ala fin dla finedes coche scincunda per l Tublà y per la curnisc da mont che la tol su, uniral metù ora na culezion de chertes da mont da zacan lauredes ora dal’artista.

Laurina Paperina (Rovereto, 1980) se muev da for sun n orizont culturel amez ite danter l mond dl cartoon, dl fumet y dla cultura pop, dajan vita a n’ert sarcastica y ironica. Se nuzan de na gran cumpëida de suporc y mesuns, coche chedri, dessënies, nstalazions de scultura, murales y animazions, mostra Laurina Paperina l mond tres n filter de humor sterch y che tol ca. L’artista à fat pea pra n grum de mostres publiches y privates te n ntëurvia internazionel y à dat vita a proiec y publicazions. De gra ala gran fazion comunicativa de si ert ala abù nce culaburazions extra te cuntesć nia cunvenzionei, sciche cun cëses de moda, firmes, musicisć y monce cun l team Moto3 SRT VR46.