L pest de 6.500 Euro metù a ji dal SKB (Südtiroler Künstlerbund) n culaburazion cun la Fundazion Cassa dl Sparani de Südtirol va al scultëur Aron Demetz

L pest SKB ie da ntënder sciche testimunianza de stima per prestazions particuleres tl ciamp dl’ert. Premià vëniel l’opera cumpleta dl artist, nia lëures singuli, cun referimënt speziel a persones che cun si lëur à dat n cuntribut relevant ala vita culturela de nosc raion. L pest SKB vën sëurandà a artisc dl ciamp dl’ert figurativa, leteratura, architetura y mujiga. Aron Demetz descënd da na familia de scultëures de Gherdëina. Tl 1986 àl scumencià l studio tla scola d’ert de Sëlva, jit inant nchina l 1993 tla scola prufesciunela dl ziplè y depënjer for te Sëlva. Tl 1997-98 studio de scultura pra l prufessëur Christian Höpfner tl’Academia d’Ert a Nürnberg ti Paejes Tudësc.  Aron  Demetz possa mustrè su na cumpëida mpurtanta de mostres persuneles y coletives te Europa, Asia y America. Dal 2010-14 iel stat prufessëur de scultura tl’Academia d’Ert de Carrara (Toscana). Pra la 53ejima Mostra Biennale de Unieja àl metù ora deplù lëures tl Pavillion dla Talia.

Aron Demetz ie nce cumëmber dl cumitè scientifich dla lia culturela Tublà da Nives te Sëlva.