Daviert uni di ora dl lunesc dala 16.00 ala 19.00

Siegfried Irsara ie nasciù ai 21 de dezëmber dl ann 1927 y ie chersciù su sun l luech da paur Ciampidel a Antermoia tla Val Badia. Ël fova l plu vedl de set mutons. Cun 21 ani fovel ruvà te Gherdëina per crì da lëur y tlo iel restà.
Ël à dedicà na vita ntiera al lëur da tistler, n iede sciche prufescion y pona sciche pascion. Monce cun 90 y passa ani jivel drët suvënz y drët gën te si berstot ju n ciulé a fé d'uni sort de miniatures che reprejentova la vita da zacan, l lëur da paur, che ël cunesciova drët bën. Chësta miniatures che ël à lascià ie na testemunianza de valor y na documentazion storica de coche fova la vita te nosta valedes dan cënt ani.
I modiei fajovel do si lecorc da pitl, nsci ovel fat do l mulin de si ncësa n scala 1:10, dut adamënz! La stala, na luesa da corni, na calés cun ciaval, restiei, pëighes, pënesc, ërces... dut cant univa ispirà dai biei lecorc che bera Siegfried ova de si familia, lecurdanzes che ti stajova scialdi a cuer.
Duta chësta miniatures fova lauredes ora nfin tl mënder detail, dut scialdi apuntin, ël ziplova nce duta la njinies che fova ntlëuta te cësadafuech, te standegun, te stala, te medel samont, te mulin.
Chësta truepa miniatures (plu de 60) al nce pudù mustré te deplù mostres a Urtijëi (2014), ma nce a Sterzing, a Steinhaus tl Ahrntal y nchinamei a Palestrina dlongia Roma.
Bera Siegfried Irsara à tëut cumià da chësc mond ai 10 de fauré 2020 cun 92 ani.