Giaurida: 1 de fauré 2018 dala 20:00 cun ntroduzion artistica de Denis Isaia

Orar dla mostra: uni di dala 16 ala 19

Cun la lingia nueva de lëures “n mumënt” presënta Thaddäus Salcher dessënies, reliefs y scultures che va ite n dialogh danter sujet y cuntreda, cossa che ti sta scialdi a cuer al artist. Avisa sciche te n film vën i vijitadëures dla mostra cumpaniei damprovia te na ancunteda dadaujin y mpatica cun n mumënt de legrëza, n aiét che ti dona ala esistënza dla persona zeche de utl y de misteriëus.

Thaddäus Salcher (Persenon, 1964) fej pert dla generazion nueva de artisc´ ladins. Ora de avëi metù a jì truepa mostres persuneles y fat pea pra n valguna coletives (lecurdon chëles fates da permò tla “Galerie an der Pinakothek der Moderne barbara Ruetz, Minca (2016 y 2017), Südtiroler Künstlerbund (2016 y 2017), Kunstforum Unterland (2017), Galleria Doris Ghetta (2016),  à si lëures giapà recunescimënc  pra cuncors privac y de istituzions publiches cun proiec mpurtanc sciche l’alestimënt dl presbitere dla dlieja de Persenon y de Schenna (2016) na opra d’ert pra la scola provinziela profesciunela de Bornech (2013) y l proiet artistich  „Menschlichkeit“ per la cësa nueva dla Cassa Raiffeisen a Ciastel (2011).