ν La Scola Mesana de Sëlva mët a jì ti cater selfs dl Zënter manifestazions cultureles “Tublà da Nives” na mostra artistica cun materiai de refudam rezitlei.

Duc i sculeies à abù la puscibltà de desmustré coche n pò fé ert cun d’uni sort de materiai de refudam, coche per ejëmpl pec de computer, tòc de radio, butons, lumes, ciauzei, struplons, bozes de plastica, roles y nsci inant y svilupé cun gran fantasia y criatività de drëta operes d’ert.

L fin de chësc pruiet ie chël de fé pensé do duc canc, sibe jëuni che manco jëuni, sun la gran mont de refudam che n produj uni di te nosta cëses y sensibilisé la jënt a mëter plu a verda cie che n tol tla mans, cie che n adrova veramënter y scumencé da nëus nstësc a adurvé cosses y materiai che se lascia rezitlé y produjer nsci manco pestaria.
Ntan l’ëures de educazion artistica y chëles de tecnica y nce ntan l’autra materies à i sculeies cun si nsenianc y nseniantes laurà ora de
pitla opres d’ert, che duc arà l’ucajion de udëi metudes ora tla mostra, che unirà giaurida n sada ai 30 d’auril 2011 dala 10 danmesdì. L di dla giaurida purterà dant i sculeies nce pec de mujiga, poejia y bal, che à da n fé cun chësta tematica.