Stimei cumëmbri y amisc dl Tublà da Nives!


L tëmp dla stluta ublieda per la pandemia dl Corona Virus ie passà y pudon finalmënter inò pië via cun nosta atività, nce sce sambën cun la mesures de segurëza che l sarà da tenì ite y respetè. L program de mostres njenià ca ie scialdi nteressant y speron de pudëi l trè tres tl respet dla regules, ma dantaldut per l bën di artisc´ y dla ueia de duc de pudëi viver la cultura y l’ert dal vif y n prejënza. Se ncuferton sun l instà de mostres y de pudëi ve udëi y ancuntè tl Tublà da Nives.
Cun chësc scrit ulessans Ve nvië a resté inant cumëmber/cumëmbra de nosta lia culturela. I nvic Ve unirà - sciche nce l ann passà - mandei da iede a iede tres posta. L cuntribut de 15,00 Euro pudëis gën paië ite sun nosc cont pra la Cassa Raiffeisen Gherdëina, IBAN IT 77 I0 8238 5889 0000300040703. De gra!



Mostres ududes dant per l ann 2021


ANNELIES PICHLER: 28.05.-20.06.2021
ROLAND PERATHONER: 02-28.07.2021
LOIS ANVIDALFAREI: 05-29.08.2021
GOTTHARD BONELL: 03.-26.09.2021
MATCH ART (segonda edizion): 30.09.-02.10.2021
SIMON OBERBACHER & PAOLO ROSSETTO: 08.10.-31.10.2021
SERGIO SOMMAVILLA: Nadel 2021



ANNELIESE PICHLER

GO BACK

29/05/2021 - 20/06/2021

Inaugurazione: Ve. 28.05.2021 - dala 18:00

Introduzione: Elio Vanzo
Intermezzo: Martin Holzknecht

Orar: merdi-dumënia16:00-19:00
Lunesc stlut

> GO BACK < – na retrospetiva.

Jì de reviers per crì l’identità tl labirint dl ie. Se pierder per ruvé inò a cësa. Uni cheder ie per n mumënt curt la cësa dl ie, n mumënt che se tira ora per for… scialdi plu giut ie l ne vester nia presënc y l ne se recunëscer nia plu, giut alalongia, per n tëmp da stramp lonch … Uni cheder cun si originalità descëida ora te mé l sënn y la calma y tl medemo mumënt pierdi la cuscienza.

Anneliese Pichler nasc a Cavalese (TN) tl 1962. Ëila fej l Lizeum d’Ert privat a Milan. Tl 1982 studieiela  “Affresco e pittura murale” tla Cademia Estiva cun l pruf. G. Hoke. La studieia y arjonj meric speziei tla Cademia Estiva Internazionale “Hortus Niger” y “Hoke Schule”, n iede a Verteneglio (Istria) y pona a Halbenrain (Austria). Ti ani che vën do scumëncela na culaburazion longia cun la galaria tiroleja Hosp de Nassereith. Si opres vën metudes ora tla Art Fiera de Dispruch, Dornbirn (A) y Karlsruhe (D).

Ntan l 2013 ala tëut pert al “Haus Tyrol Europa”, n proiet Euregio Bruxelles y Art Fiera Verona y arjonj la senialazion dl “Premio Icona”. L’artista se dà ju mascimamënter cun dessëni y pitura cun tecnica mescededa sun papier da tëiles, ma nce cun cosses.