Egon Moroder Rusina

Mostra "Fla"

13/04/2014 - 11/05/2014

Vernissage: 12.04.2014 - 18:00
Saluc: dr. Peter Mussner, ambolt
Ntroduzion: dr. Lukas Plancker, assessëur ala cultura
Relazion: Egon M. Rusina

Orar dla mostra:
Uni di: 10:00 - 12:00 & 15:00 - 19:00
Lunesc iel stlut

Egon Moroder Rusina, artist de Urtijëi nasciù dl 1949, prejënta ti cater salamënc dl Tublà da Nives na instalazion de 150 chedri sul tema “Flà”. L se trata de pitures feter monocromatiches, de dessënies cun l rispl y de tesc scric che Rusina à laurà ora ti ultimi 3 ani. L instalazion ie spartida su te trëi zicli, sun chësta tematiches:

a)  Atman tl nibl
b) 
L tëmp dla nëif
c) 
Slaier dl dlà

I trëi temesc che te si senificat formel semiëssa vester desferënc, cuntemplea alincontra la medema cossa: la lerch nfinita dl uet, l nia, l tëmp che passa zënza fin.
“Atman” ie na vedla parola dl sanscrit (India) che descrij avisa l senificat dla parola ladina fla. Chësta tematica vën mustreda da Rusina cun 80 chedri (uni cheder singul ie de 70x50 cm) de culëur monocromatich turchis, metui adum te na unica instalazion de 15 m de lunghëza per 2 metri de autëza.

“Nëif” ie per Rusina l cunzet che miec de duc cuntemplea l vester te si passé zënza fin. L se trata de n tema elaburà da Rusina ntan i ultimi 3 inviërns passei tla montes, dessenian me cun l rispl. L instalazion de 36 chedri (per n total 8 m x 1,5 m) mostra su la cuntreda de nëif belau astrata, desseniëda cun na cumpëida nfinita de risses finiscimes, belau sciche n desert blanch.

Tl “Slaier dl dlà” vëij Rusina n mond rie da capì, sibe te si scumenciamënt che te si fin. La cumposizion ie data da n adum de chedri cromatichs che va dal violet-cueciun al violet-brum (7 m x 1 m).

I dessënies y la pitures de Egon Moroder Rusina ie fates ala lergia, sui 2000 m de autëza de Resciesa-Cuecenes. Ël depënj tl sulentum dla montes y se nuzea dl introspezion y dl’analisa dl’ana per ruvé ala ravises de si vester. For inò se damandan, cun spirt critich cunvenciù, ciun che ie l vëir senificat y l valor dla vita y dl nia.