MARGARETH FORER

RESONANZA

07/06/2019 - 30/06/2019

Giaurida: 6.6.2019 - 20:30

Ntroduzion: Roland Verra
Intermezzo: Georg Malfertheiner

7.6. – 30.6.2018

Uni di: 16:00 – 19:00
Vënderdi: 20:30 – 22:30
Lunesc stlut

Resonanza


L’artista Margareth Forer nes presënta te chësta mostra l frut de mo n’autra fasa de si tueda desvaliva de sé nstëssa, te n liam sterch y mpeniatif de figura umana rapresenteda te episodes emblematiches defrëntes dl’esistënza y de paesaje, purtà dant te si cumpunëntes essenzieles, geologiches dijëssi, che mplenësc l corp y devënta n si elemënt costitutif.
Chësta tueda arzica la semianzes plu sotes dla persona, nchin a se nfidé ite tla sferes dl nia-da-crëier, dl esoterich, te chël che pudessan numiné n “esprescionism intuitif”, ulache la naturalëza dl’azion artistica se balanza ora cun na reflescion sota sun la gaujes ultimes dl’esistënza.
Depierpul ne schiva l’artista nia l cunfront cun aspec francamënter plu critics dl didancuei, coche l vën ora tler tla lingia dedicheda al turmënt tecnologich dla “Muses digiteles” te chësta realtà dumineda dala comunicazion eletronica spëssa, furënta y senestra, che manacia nchinamei nosta essënza umana nstëssa.
Do avëi purvà ora bele tl passà l passaje tres la forza d’esprescion essenziela de si cuntredes, te “Resonanza” ti va Margareth Forer do ala sintesa de chëstes cun la figura umana, nsci da despassé via i cunfins danter i doi ciamps, abinan ora datrai n resultat plutosc furest, ma for senificatif ti cuntenuc de si esposizion coche nce tla  presentazion estetica.
De gran fazion visiva ie la trilogia dl bal, te chëla che la figures ie cunliëdes danter ëiles te n raport dualistich y a chësta moda abìneles inò ca chëla naturalëza che la despartëza dla vita de ncueicundì nes refusa.  
Si persunajes nes vën suvënz dant coche brancëi ite da na pesima zënza respostes, nsci sc’che tl lëur de crì si drë senificat dla cosses y di destins dla persones y ala fin dla finedes sàutel ora che l ie propi chësc l messaje sot de chësta lingia de lëures dl’artista, che mët a lum mo n livel de madurazion mplu te si viac persunel y artistich.
Roland Verra