ANSELMO OBLETTER

PITLA RETROSPETIVA

22/04/2022 - 08/05/2022

Giaurida: Ve. 22 d’auril 2022 dala 6 da sëira
Moderazion: Greta Langgartner, art-director
Ntroduzion artistica: Marina Manfredi, prof.ssa pra l'Accademia delle Belle Arti de Unieja

Una dla cualiteies che luna ora dala produzion artistica de Obletter ie la coerënza struturela che ie laite te uni si opera. Aldò de si maniera de lauré la scultura, cun na merscia che nes lecorda Michelangelo, vën l corp uman, udù mprima coche na massa voluminëusa, smendrà y scemplificà nfin a se redujer te na figura che sta sun l lim danter forma figurativa y astrata y devënta na cariàtida moderna mbalucheda y ngrifeda tl spazium. La lesures dl corp se cuncretisea te n parados artistich, miec dit la negazion de cie che ie per si vester propi de sé nstës: l muvimënt che dà mpe da ntënder l’aria che les ncërtla y ti passa tres. Propi nce l material che l artist à l plu gën, l miërmul, azentuea la forma te si architeda y imobilisazion, na forma che nes lecorda Apollo che cun si fremëza pèr ndesfidé l tëmp che passa. La natura, pont mpurtant da chël che Obletter pëia via cun si sintesa figurativa, vën nterpreteda a na moda da desmazé n raion te chël che la memoria visuela anconta la fantasia criënta: i uec, i dulei, la spurjënzes de na scultura ncaunia ite te sé nstëssa l mudamënt dla formes natureles per les cundujer te n retrat che dura y che ngenerea ch’la ilujion de eternità tan tingëda da Canova. La scultures de Obletter comunichea cun nosta ana plu sota y lascia unì a lum zeche de nuef y de autramënter te chël che l’opera devënta la cuncretisazion fantastica dla persona te n dialogh zënza fin danter s’enmaginé y udëi.