Peter Demetz

Chiec

09/07/2022 - 31/07/2022

GIAURIDA: vënderdi 08.07.2022  dala 8 da sëira

Ntroduzion: Eva Gratl, cultural publicist.
Intermezzo: Laura, Lukas, Maxi & Tanja

09.07. - 31.07.2022
Uni di 16:00 - 19:00
Dumënia, mierculdi y vënderdi: 20:30 - 22:00
Lunesc stlut

L nia cunesciù y l chiet tl spazium

"Chiec" ie l plurel de chiet; chësc ie l cunzet dl sté decà y metaforich sun chël che l artist Peter Demetz mët l azënt y nes prejënta nsci si mostra nueva. Si lueges ie n palch cun figures architedes, te n chiet dialogh y che sta decà... Nce l tëmp semea che l stebe fërm y l descëida pensieres che, sciche na instalazion, ti dal forma a n spazium te n auter spazium. Per arjonjer chësc "chiet" chier ora l artist bele dai ani si troi particuler y nes porta te n'atmosfera defin singulera. L nes prejënta figures te n mez relief: doves, trëi, suvënz nce sëules, te n ambient da d'ëiles crià. Peter Demetz sotrissea che l pea via da cënc y cënc de fotografies, che l ti fej ala jënt che l vëija sun streda y sun plazes defrëntes. Chëstes ti juda a ti dé forma te na luegia de pensieres figuratifs. La figures sta decà, ie destëutes dal vijitadëur, cëla tres vieresc ora y se spidlea. Te si "light box" se cuntenteieles de sé nstësses y l semea che les ne mostre degun liam cun l’autres. Te chësc spazium zënza mubilia ne n'ales nia si dumbria. Peter Demetz lëura sciche n regist, ora dl lën crieiel juesc otics de spazium y porta dant szenes da uni di. Nëus stajon decà cun i braces n crëusc, la giames ndrëtes o n fregul ti jenodli, n brac permez ala urëdla che stiza su l cë. Stajon te nosc mond y penson do: De cie vala pa? Ciuldì pa? Nëus ne udon nia de cie vieres che la figures cëla y nsci devënta chësc sté decà na rafigurazion dl dedite che vën reprejentà tl dedora. La figures ie n portret, purempò ne mostreles degun sënies de recunescimënt. Szenes ora de si perzezion artistica, reflescions liedies y usservazions persuneles. Reflescion ie la parola-tle che caraterisea l'ert particulera de Peter Demetz te chësc nosc cialé. La va de n pensé do n cont de nëus nstësc y spidlé l mond dedite, che tl chiet dl artist vën purtà ora.

Eva Gratl
trad. Erna Bernardi